Bèste gròndj, de

Tekst: 
Jos Otermans
Plaats: 
Schinnen

Kènt geer nog de plaats woo geer zeet geboare ?
Wit geer nog 't versjil tössje terf en anger koare ?
Wit geer nog de tiéd wie ze wirkte op 't veld ?
Toen moos veer oos dèk bökke, veur ein heel klein bietje geld.

Refrein:
Joa, dat woar de bèste gròndj.
Toen woar de weareld nog gezòndj.
Doa is gein sjoander pleatske in oos Limburgs landj,
dan woo oos weegske ummer sjtòng.
Woo ich es jungske vreuger höb gesjpeeld,
en auch nog noa de kirmis gòng.
Mer al is heel get landsjap weg,
en is dea tiéd al lang veurbiej,
toch houd ich heel deep, joa, heel deep in mien hart,
ein pleatske veur dat alles vriej.

Höb geer 'ns in 't veld eine knién of haas gevange ?
Zeet geer 'ns in 't duuster noa de Thöllerboesj gegange ?
Höb geer 'ns koéleköp gevange aan de Mulderplas ?
't Woar doa waal geveirlik, mer dat woar noe net de sjpas.

Wit geer nog de name die men nooit mear zal vergeate ?
Höb geer 'ns noa de sjoaltiéd achter vrouwluuj aangezeate ?
Zeet geer 'ns noa de Hoagmès noa 't voetballe geweas ?
En doa noa mit zien alle zoépe op ein sjuurefeis ?