V’r neume häöm ’t blomemenke went zoeë kint häöm ieëderaen
Hae is zieëker’al in de zieëvetig maer nog ummer good ter baen
Wie’r hét zouw ich neet waete, ich höb ’t häöm aoch noeëts gevraogd
Hae waor direk ’t blomemenke, van d’n ieësjte kieër wiej ich’m zaog

Mit zien blome en plante in prieës en in kluër
Zoeë kump hae al jaore mit ’t kerke langsj de duër

Köps’te gét dan zuus’t’m lache, mér köp’ste nieks da kiek’er kaod
da grauwelt hae gét in zien aege en gaet wieër in de sjtraot
Soms da zuus’te häöm nog laope es ’t ’s-aoves duëster wuërd
Allaen ziene gank dae is dan traoger, maer ’t kerke is laeg en de cente gebeurd

Es ich häöm noe zoeë zieën kómme dink ich waal wie lang noe’nog
Ins zal hae toch mótte sjtoppe went d’r laeftieëd haet’r toch
Dan zulle’vieër’m pas gaon misse és‘dr ieësjdaags neet mieë kump
Es’r meug is en wilt ruste of és ’n kirkklok dan vuër’m trumpt

Mit zien blome en plante
Zoeë kump hae al jaore mit ’t kerke langsj de duër