Refrein:
De bank … is miene ruggesteun
Waorop ich vastelaove's leun
Want zit ich ein hiël klein bietje krap
Dan gaon ich nao de flappe-tap
En as dae mich dan haet bedint …

Kan ich wer lekker door 't lint
Ich kaup mich drèij daag aan ein stök
De toegangskaart tot 't gelök
De heemelpoort die sjteit nach altiehd godzijdank
Beej de flappe-tapper van mien eige bank

Mèt cente köpse gin gelök
Det zag mien vader vreuger dök
Mer zônger geld en op zwart zaod
Hes'se ut moeilijk kammeraod
Wilse mèt vastelaovend wat besjtelle konne
Dan vreugt dae oober êlke leevering um bonne
Dus haal ich iërs ein lading flappe oeht de sjuuf
Veurdet ich nao de vastelaove's-gala sjtuuf

Mèt flink get cente op dae bil
Kaup ich mich alles wat ich wil
Ich veul mich net Daagobert Duck
Ich laup op wolke van gelök
Ich kaup d'n tap, de discotheek en 't orkest
De blaoskêpel, de raod van èlluf en de rest
As ich de waereld mèt mien narrekap bekiehk
Dan veul ich mich de keuning nach te riehk

Zoë trèkke wae kroeg in kroeg oeht
Wae volge trom, trompet en toeht
Ich heb de flappe in de hank
Ich ôngersjteun de middenstand
De kastelein is mèt dees daag eine raare
Dae geuft niks oeht dae is nôw drèij daag aan 't spaare
Det is de reeje auch waorum ich um stiëds dank
Want hae zêt straks mien geld wer netjes op mien bank