Veer wolle op concours gaon noa ‘t LVK,
en trokke mit bravour ’n leedje oet de la.
Zoä zoog v’r os al sjtaon in de finale,
meh hoofde neet te gaon, dus dat waor bale.
De jury zag: “heij jonges..., dat dingk haet kop noch sjtaart”.
Ach houw veer ós dat geld veur 1000 kaarte mer besjpaart.

Refrein:
Veer trèkke weer de groäte brook aan,
en haole oet de kas, de groätste die os pas.
Veer trèkke weer de groäte brook aan,
van besjeije zin höbbe veer gein las.
Veer zègke: ’t mót lukke, veer zègke: ’t kump good.
Sjtrak zit v’r mit de sjtukke van al dae euvermood.
Veer trèkke weer de groäte brook aan,
en haole oet de kas, de groätste die os pas.

De waage veur d’n optoch waor te zjwaor belas,
en bie d’n ieësjte boch toen gong ‘r door zien as.
De wiele waor v’r kwiet dus mos v’r drage;
geluif dat ich de sjiet kreeg van dae wage.
De jury zag: “heij jonges..., zoä’n dingk dat gaar neet löp,
geer sjnap waal dat g’r dit jaor weer d’n ieësjte pries neet höb.