Iech stèl uuch veur vrund Keube Mingeleer,
Konductör vaan de nuijen tram,
Dee 't iers in eus stedsje is gewees
veur Den Haag en Amsterdam
Meh, Mestreech dat is mèt alles veuroet,
Boe dat geer ouch gaot of staot,
Daorum koos ouch eus burgerij,
'ne spekslachter in de raod.
Dat 't dee mins dao beter geit,
dao-aon twiefelt geine maan
Es heer dao mer zoe good ze wäördsje deit,
es heer stumpkes make kaan

Komp geer in Mestreech aon de statie aon
Nump daan dadelek e keertsje veur ein rout'
Dao is niks wat wie deen tram uuch rije kaan
Daobij kint geer gein koed.
Want zoonder peerd of zoonder geitebok
Vare veer uuch door de stad Mestreech.
Geer veult geine sjók of geine stoet
't is euveral gelieke weeg.
Gein keije steke mie veuroet,
En gei peerd sleit mie op hol
Jao, zoe ritsje deit uuch woondergood
De ganse stad is daovaan vol.

D'n awwen omnibus is allang eweg
De gaastram baorde 'm in de groond.
Meh, heer rijt 'smörreges door de straote nog
Ze hole dao de pemeij mèt roond
En Kerbusch zöchde in de groetste noed,
Heer sjroufde zien bubskes weer oet'rein
En hóng 't vel mèt 'n touw aon edere poet
Veur z'n vinster es valgordijn.
Ziene wagel dee koch Zomers op
En komp geer noe 's aovens aon de brök
Dao vint geer dee zefstandege omnibus
Es patates frietkraom trök.

Veural veur aw jóng-döchter in Mestreech
Is euzen tram vaan groet belang
Geine wind of rege steit hun mie in de veuj,
Ze zien veur geine bliksem bang.
Goon ze noe 's aoves op .ne leefste oet,
Gekleid in plusj of velour,
Ze stappe in d'n tram, al sniejt 't tot 't rouk
En numme z'ch 'n kaart retour.
Wee weurt daan ouch neet verzeuk
Door zoe geziechske, leef en zach.
Wie mennege jong door deen tram neet verneuk
En in ze leid gebrach.

Es geer noe de Maosbrök passert
En geer lop aon de verkierde kant,
Daan weurt g'r 'seffens verbalizeerd
Eus deenders zien zoe bijdehand.
Zien ze eine dee get väöl gedroonke heet,
Daan loupe ze oet alle mach,
De boeje weure 'm opgezat
En heer weurt nao de buro gebrach
Dus zeet wie in eus stad Mestreech
Alles geit veuroet.
Jao eus deenders drage kapmantels ezzebleef
want Mestreech geit veur Peries neet achteroet.

Doch dames huurt noe nao mien wäörd
En blijf oet de Groete Staat,
Want geer haolt uuch nog 'ns 'n ongelök,
Jao, dat is zeker, vreug of laat.
Want mèt de mouwe zeve èlle wied,
Moot 't niks bezunders zien,
Dat es geer dao te praote staot
Gepak weurt door 't mesjien.
Daorum dames , iech waarsjouw uuch veuroet,
Blijf oet die straot eweg
En roop mèt miech:' Hoera Vivat '
De gaastram vaan Mestreech.