Ins trok 'ne romeinse veldheer door 't land van Rien en Maas.
In Sjin zat hae zien tent neer, woort sjnel doew hie d'r baas.
Mèh zien paerd kaom d'r Keuteberg neet op, 't bleef bie Ingwaege sjtaon.
De germane baoven op d'r top, die waore neet te versjlaon.

Ins kaom de sjpaanse furie euver 't limburgs heuvelland.
Spinola mit zien kavallerie sjtook plunderend Sjtröch in brand.
Mèh zien paerd kaom d'r Keuteberg neet op, 't bleef bie Ingwaege sjtaon.
De partizane baoven op d'r top, die waore neet te versjlaon.

Doew kaom de franse revolutie auch euver oos geuldal haer.
D'r Napoleon zat zien artillerie vlak bie Ge Panhoes neer.
Mèh zien paerd kaom d'r Keuteberg neet op, 't bleef bie Ingwaege sjtaon.
De patriotte baoven op d'r top, die waore neet te versjlaon.

Refrein:
Keuteberg, doe bis d'r keizer van 't geuldal.
Keuteberg, dien sjoanheid die gaet baovenal.
Keuteberg, sóms bis doe hel, sóms auch sjarmant.
Keuteberg, sjtielste berg van 't heuvelland (2x).