Ich kiek doer ‘t vinster, noa de sjtroate, de pleine
Wie ze danse de schaduw, ‘t leech
Grieze wolke die drieve, parapluie te uuver
'T raegent hel es ich weer ‘ns opreech

En tussje al dat geweld brik d'r hieëmel da oape
De kirkklok sjalt in ‘t rond
Inne sjtorm in mien glaas, zonnestroale en druppels
Ontmoete elkaar op de grond

'T is kirmis, kirmis in de hel
De boksbal sjteet naeve de karroessel

En ooch al zit ich hie binne ich wil zinge in de raege
Ich wil ummer inne hieële boel
Ich kiek weer noa boete, ‘n kindj op ‘t plein
Trapt in inne plas dat is wat ich bedoel

En op zeuk noa de reden, maak ich weer de fout
Om alles in ‘n kader te wille plaatsje
Ich kiek doer ‘t vinster noa ‘t laevend sjilderie
Woa ‘t kindj noe op sjtroat is aan ‘t sjaatse

En in mien welt hie binne vol potentiële probleme
Dink ich trük, wie alles begon
Ich kiek van binne noa boete, doer te beslaage roete
Noa ‘t rendez-vous-tje va raege en zon

Of goa ich noa boete en ich dans mit dat kindj
Want mit krismis kint ‘t sjeête ooch sjtoppe
En pluk ich de daag, dae de nach noëts kint ontvluchte
Lieët mien hart de dinger weer sjneller kloppe

'T is altiëd kirmis in de hel