Land vol greujend grazig greun
noe vuuër ós zoe gans geweun
gebaoren oet ’n zieël va duuster zjwart
woe d’r miensj woert gevraeten en gehard

Dao greuije Lariks, berk en dennebaom
gaeven ós noe nuij d’r aom
woe vreuger i d’r pieler vol va kaolesjtöb
woerd gesjraveld mit hammer en mit sjöp

Koumerberg durch ’t noeste wirk óntsjtange
woe koelmansblood en zjwaet vuur hant gesjträömd
woe de boerehäöëf en’ t land verlaore zint gegange
doa is ’t noe weer good, sjoeëner wiej oeëts gedräömd

De zón verdaelt zien sjtraole
rónd d’r berg va sjtaen en kaole
es d’r koelpiet aafvoert i d’r sjach
verangerde vuuër häöm d’r daag i nach

I d’r tied dae vuuër ós ligkt
en gaen klaorte mieë óntbrikt
laote vier de koempele in hun waerd
doezend mieëter en mieë nog i g’n aerd