Hae es d’r altiêd beej, al fieertig jaor op ri-j
Fieërtig jaor op ri-j, beej de zate hermeni-j
Al hieël zie laeve lânk, bleusj hae de schoeënste klânk
Bleusj de schoeënste klânk ônger invloed vanne drânk
Lewi-j dae bleusj met hert en ziel
Zien parti-j met e völ te hoeëg promiel

Refrein:
Doeër de straot uut de maot, en in kinnelike staot
Trektj oeës zate hermeni-j, waat zeen ze gruuëts en bli-j
Met de fles inne tes, es Lewi-j vanne purti-j
Beej de zate hermeni-j

Ze trekke doeër de straot, ze blaoze uut de maot
Blaoze uut de maot, met applaus van jônk en aod
Ze make dri-j daag lôl, wi-j haoje ze det vôl
Haoje ze det vôl, zeen di-j joonges dan van staol
Lewi-j bleusj straolendj van gelök
Hieël de zate hermeni-j (nog) vanne zök

Ineins waas oeës Lewi-j, us neet vanne purti-j
Neet vanne purti-j beej de zate hermeni-j
Wi-j es det dan gegaon, wi-j kân zoeë wat bestaon
De drânk hieët oeës Lewi-j noow de das toch umgedaon
Lewi-j dae bloos op klaore drânk
Zien purti-j âl di-j fieërtig jaore lânk

Laatste refrein:
Doeër de straot uut de maot en in kinnelike staot
Trektj oeës zate hermeni-j, Lewi-j es dao neet beej
Sônger fles inne tes es Lewi-j vanne purti-j
Beej de Hieëmel-hermeni-j.