Refrein:
Zeejjae auch as Wieërter geboeëre
Dan veuldjae auch al hieël vreug de lôl
Gae zeetj dan vör altiêt verloeëre
Vastelaovuntj zitj uch inne bôl
Dan zeejjae doeër nemus te stoppe
Gae laeftj d'r 't hieël jaor nao tow
Van tieëne tot eur vîngertoppe
Veuldjae eder jaor det opnow

As klein kîntj met keelke en klekske
Gaojae met eur mam en met pap
As e klein vastelaovuntj-gekske
Nao d'n optocht en auch met op stap
Zeejjae dan wat aojer gewoeëre
En gaotj met wat vreendje op stap
Dan toêtj de meziek in eur oeëre
En gae dînktj aan 't vuuërbieëltje van pap

Zeejjae dan getrouwtj en hetj wichter
Begintj 't van vuuëre aaf aan
Di-j gaon met gesmînkdje gezichter
Met uch met en d'r goot tieëgenaan
Zoeë gieët det mer doeër en det mot toch
Want ein dînk es hieël zieëker waor
In Wieërt vastelaovuntj bestieët nog
Minstes ein, twieë of drejhôngertj jaor