Ik woel 't nog ens hebbe euver jaore lang geleje
Toen weej staek aaf, verloste-pot en andere speulkes deje
D'r woort beej ôs toen in de buurt ouk aan toniël gedaon
En minnige knöl haet in daen tied veur 't iërs op de buun gestaon.
Det waas dan meistal hej of dao lin de schop of in ein getske
Veur d'n entree van ein schorseneer, enne smaerlap of ein pletske.
Maar smeis dan woort d'r in de sprung enne schouwburg neergezatte
Van boënestake, plenk en zek en alde keukematte.

Dan woort gebouwd dan woort gesjouwd en eder leep te kume
Kroop beej zich thoes de zölder op um grei beejein te schume
D'n deze vond ein ald gerdien en dae ein beddelake
De krômme had behangpepeer um achtergrônd te make.
En Everaat dae laajde zich wao zien elders niks van wiste
De witte zakde bej um thes van iefer door de vliering
Maar brach toch alle luchjes mei oet de kis met kersversiering.

Lewieke dae aan 't tummere waas bleef aan enne nagel haöke
En zoot met de haempslup oet de bôks op 't schouwburgdaak te baöke
Doordet hae toen neet good miër zoog had hae zich op d'n doem genaegeld
En kwaam inens met daak en al de ledder afgekaegeld.
Weer woort gezaag, gedouwd, gehöf, getrokke en geklômme
En stônd de tent ein bietje wings, det kôs ôs neet vuël bômme.
't Waas veur ôs ein kunspalies, ennen tempel van de muze
Waonao de jônge oet andere straot nog neet ens meugde wieze.

En as de schouwburg vaerdig waas dan ginge ze repetere
D'n teks dae stond neet zwart op wit dae meus me fantasere.
Veuraaf woorte in de ganse straot buljette opgehange
'Komt zien het drama in de keet, een lap op alle rangen'
Dan naölde we Moder aan de kop en ze kwaam d'r neet miër naeve
Of ze meus ein aörtje en twië cent out eure schollek gaeve.
Ik stônd met 't geld in de hand geplek, ein diek oor van te veure
Te wachte op 't aopegaon van de pappendekke deure.

D'r woort enne kiër ein stök gespeuld, wie hoot det toch ouk weer
Zoë effe in 't kort verteld kwaam d'n inhald heej op neer:
Ein modet had ein ieferig kind det op schoël hiël erg braaf waas
Maar ze zumpde zoë umdet eure man aan de sterken drank verslaaf waas.
't Kind kwaam met eine pries van schoël hiël blie nao hoes geloupe
Dae noem de zatlap um weer aaf en woel 't dink verkoupe.
Maar wie '''t kind zich van verdreet lankaaf in de baek woet smiete
Smeet Pap de kroek jenever weg en Mam heel op met kriete.

In hiël mien vaerder laeve zoog ik noëts zo schoën actere
Met zoeveël actie en mimiek en zônder te soufflere.
Lowie as vader keek zoë zat van ônder zienen bolhood
Asof hae wies zien roëje haor ram met jenever volzoot.
Dao zoogste Graad as erme moder prachtig speul vertoëne
Al kös hae in daen alde pôn zoewat met dreej man woëne
't Waas curieus wie Thies as kind ein beeld van vliet en deug waas
En eder wis det dae op schoël veül lever lui dan meug waas.

Heej woort gespeuld met euvergaaf, woort groëte kuns gegaeve
En 't waas frappant wie of 't publiek zoe vóllop mei kôs laeve.
Wie de zatte man de buun opkwaam, reep alles: 'kiek dao kumpe'
En Lewieke ging zoe zat te kiër, det de maedjes ging zumpe.
Dao reep ein jungske heis van gif, wie de vader 't kind woel houwe
'As dich dien puët neet beej dich hilds, dan zal ik d'r dich ein bouwe'
Wie harder det de Moder kreet, wie miër leweit weej makde
Wies det de ganse iërste rang door de planke zitting zakde.

't Stök had ônverwachs ein ind, det is now net 't leuke
Umdet d'r ein giftige moder eure nachpôn waas 'nt zeuke.
Dao kwaaminens door 't achterdook ein kwaod gezich gekeke
Det reep: 'now zuus miene gôke pôn en ik had um pas gestreke!'
En jissesmerante mien hudje ouk, wae haet dich det gegaeve?'
Maar Graadje trok ziene rok umhoëg en rende veur zien laeve.
't Stök waas oet, tenminste half, maar dao meuste w't mei stelle,
Weej ginge deep geschok nao hoes um tt moder te vertelle