Veur ene cent of veur twee öörtjes, maags doe ònger 't wit gerdinke,
kieke nao 't verbòrge bruudje, Binke, Finke of Karlinke.
Krenskes òm zien erm en köpke, gans mit prèntjes volgesjtaoke,
zit besjaemd dao 't Pènksterbruudje, of 't ei pötje hei gebraoke.

't Durf neit lache, 't maag neit kriesje, 't mòt niks angesj doon es sjwiege.
Noe ze 't door de sjtraote draage: Of ze van de luu get kriege?
'Laot òs 't Pènksterbruudje kieke, kieke ònger 't wit gerdinke:
Is 't dao sjtil in sjlaop gevalle, Binke, Finke of Karlinke?'

'Sjtil, geer zoudt et wakker maake, laot et doon esof 't niks heurde...'
Wieër draage ze 't en zènge, of dat zènge 't gaar neit sjteurde.
Draagen 't wieër in zie sjtuilke, Binke, Finke of Karlinke:
'Wilt geer 't Pènksterbruudje zeen en kieke onger 't wit gerdinke?'

Pènksterbruudje, heimlik bluimke, zek, waat zits doe zoo versjweege?
Bès doe 't Vruigjaor, bès doe 't Laeve? Waat veur zin höbs doe gekreege?
Leif symbool van baeter tieë, Binke, Finke of Karlinke.
Laot de zoomer lank en riek zeen, kindje ònger 't wit gerdinke.