Zuug dao 'ns! Wat 'n lekker pere!
En noe nao sjaol touw ? Nein,dat neet!
Iech gaon mer plenke, en prebere
Wat of dat perebuimke zeet.
Iech gaon mer plenke, en prebere
Wat of dat perebuimke zeet.

Meh um deen hoof mèt die sjoen pere,
Dao stoont 'n hèk vaan plenk gemaak;
Ziech daodoor laote koeieneere
Waos niks veur zoe'ne kleine snaak.
Ziech daodoor laote koeieneere
Waos niks veur zoe'ne kleine snaak.

'r kaom ouch t'reuver. Meh ocherrem!
D'n dokter kaom debeij te pas.
Dee deeg twie plenkskes um d'n errem
En maakd'n 'm mèt gips toen vas.
Dee deeg twie plenkskes um d'n errem
En maakd'n 'm mèt gips toen vas.