Veur des doe geis jóng, sjpek mit eier in de pan,
en ein glaeske melk d'rbie, dan bös doe zo weer de man.
Get appelesienenaat en doot dich noe dae jas maar aan,
want mit zo'n bäömke van dien moder, kins se d'r good weer taegenaan.

Mien moder haet in heel häör lange, lange laeve,
gein juu en geine donder om zoepe ooit gegaeve.
Maar zie waas 't toesfront, ederskeer sjteeds weer opnuuj,
en nog nooit ein gezich, pront wie ein ónwaersbuuj.
Dan sjtóng zie onger aan de trap, as veer nog loge te pitte,
en reep: 'Wo 't beer op velt, dao mót get onger zitte'.

As zie sjmorges dan de zaak ins had geïnventariseerd,
en ederein weer ins de waeg nao de taofel had geleerd.
Veer zagte dan: 'Mam, ich hoof noe nieks, ich kan dao noe neet taege'.
Dan zag mam: 'Geine kwatsj! Aet diene teier laeg, of mót ich dichj ins vaege?.
Veur mien paart drinks doe cognac vandaag of rooie wien of witte,
maar wo 't beer op velt, dao mót get onger zitte'.

Noe loester waat ich zegk, dit zeen de helle feite:
Veur 't zoepe gaon is d'r ein dink waat geer heel erg good mót weite.
Dink hievan nooit te lich want eine baom is van gewich,
en vergaet neet te onthaje waat mien mam zag taeg mich.
't Eerste op, de sjlaop al oet, 't sjpekvèt aan 't verhitte,
want wo 't beer op velt, dao mót get onger zitte'.