Maar lekker aet is zo lekker, van de sjechter, van de bekker,
alles sjmaak mich, nae, 't kan mich neet te dol.
En det waerd aldaag maar gekker, en ich krieg 't aan de wekker,
en opins sjleit miene cholestrol op hol.

In deze tied van branjend zoer, vette happe oet de moer,
gaon veer allemaol toch de verkeerde kantj oet.
Doe kins aete waat se wins, wiej eine frikedelleprins,
dae ein hepke it mit zien krokettebroed.

De doktor zaet: 'Höb neet 't lef, geine paté, ouch neet Du Chef,
en gein aerpelkes gebakke in gooj bótter.
Doe mós veurzichtiger gaon mauze en ouch gein gebónje sauze,
want angers ligks doe binnekort nog aan d'n dotter.

Dus veer aete van det fiene, nieks gein vet, nae lekker liene.
Maar ja, waat lekker aan ein moer is weit ich neet.
Och, ich mót 't toch maar doon, angers zien ich neet mien sjoon.
Of ich wil of neet, ich gaon maar op dieet.

Ich bön belandj in zjwaore tieje, lette op de calorieë.
Ich mót liene, nieks meer aete waat neet moog.
Maar waa's noe lekkerder as moos mit sjpek en ouch ein flink sjtök wors,
of ein lekker glaeske beer, al is 't veur d'n dors.