Veer kriege noe 'ns get gezawwel
Euver standbeelde vaan Mestreech.
't Is geine sjele wawwel
Geer zeet ze euveral langs de weeg.
Laank en klein, auch dikke ,dunne
Groet en fors meh auch dèks plat
De zuus soms neet vaan wat veur kunne
Die sjoen pronkstukke vaan eus stad
De zuus soms neet vaan wat veur kunne
Die sjoen pronkstukke vaan eus stad

Op de Boschstraot steit terdege
E beeld vaan euze Pie Regout.
Gaas liet Minckeleers dao vlege
Tösse vès en rommedou
Achter häöm steit in 't water
E sjoen beeld vaan Sint Antwajn
Heer hèlt Minckeleers mer in de gater
Mèt die vèsgeert in z'n han
Heer hèlt Minckeleers mer in de gater
Mèt die vèsgeert in z'n han

Op 't kloester zit 'nen diechter
Dee proonk dao mèt zien bloete bein
Sint Amor veult ziech väöl gewiechter
Hiel hoeg dao op 't Amorsplein
't Mooswief steit mèt häör sevoeje
En loert dao mer nao 't stadhoes.
Op 't Keuningsplein nog luij in boeije
Mèt köp zoe plat al wie 'n loes.
Op 't Keuningsplein nog luij in boeije
Mèt köp zoe plat al wie 'n loes.

Karel de Groete steit sins iewe
In de kerrek mèt z'ne kroen
Oppe Vriethof mèt drei lieuwe
Besjiete de doeve de perroen.
De gemeinteraod wis wel vaan wante,
'n Ezelke sjietgeld moos debeij
Op 't pleinsje beij de Bonnefante
't Sjit gei geld of zjweinereij
Op 't pleinsje beij de Bonnefante
't Sjit gei geld of zjweinereij

Op 'ne pileer hiel hoeg verheve
In de Percée, dao steit Selvrouw.
En veer bisjoppe deneve
Mèt hunne rögk al nao häör touw.
De stadsingel stoont verlaote
In de moer al langs de Maos,
Meh kin noe gezélleg praote
Met 'ne groete Sintervaos
Meh kin noe gezélleg praote
Met 'ne groete Sintervaos

In 't parrek dao steit vaan Oppe
Jaomer genóg allein de kop.
't gong neet gans, ze móste stoppe
Want de duite waore op.
D'Artagnan tegeneuver de bere
Dee hèlt dao hiel trouw de wach
In de buurt höbbe Mestreechteneere
De Stoomp en Dibbets neergelag
In de buurt höbbe Mestreechteneere
De Stoomp en Dibbets neergelag

Aon de Stokstraot op 'ne sókkel
Steit jao de Mestreechter Geis
Heer heet e snuitske wie 'n kókkel
't Zien mer kneuk en haos gei vleis
D'n echte geis, 't kaan neet misse,
De geis vaan de Mestreechter klaank
Jao, dat is Fons Olterdisse
Mèt de kinder op die baank
Jao, dat is Fons Olterdisse
Mèt de kinder op die baank