't raad van avontuur (oet de revu: 'rundje Bliërick op de kannepee')

Tekst: 
Frans Driessen, Ben Verdellen & Sef Gubbels
Muziek: 
Frans Driessen, Ben Verdellen & Sef Gubbels
Artiest: 
Hay Crompvoets
Plaats: 
Blerick

Iddere mins bewaert ein pötje as reserve in de noëd.
Toch köp hae zich heej ein lötje, al is de kans op priés neet groët.

Idderein mak zich ein lieske van de winze die hae haet,
en hae haop ouk op ein prieske, as Ome Jaap de nummers zaet.

Môt ik bäöke, kan ik zinge, nao 't dreije van 't raad ?
Wat zal mich de toekôms bringe ? Wat zit veur mich nog in 't vaat ?

Refrein:
Dao raatelt waer 't raad van avontuur,
ôs nummers gaon nao baove en nao ônder.
Zoëlang ik det geraatel nog maar huur,
zoëlang nog bliéf ik haope op ei wônder.
Maar steit ut raad dan stil en is die haop vervlaoge,
dan weit ik wat ik wil: nog ens ein känske waoge.
Wae wet, win ik d'n houfpriés op de langen duur.
Dao raatelt waer 't raad van avontuur.