Urges wurt ´ne wunsj gebaore
Urges wurt ´n plan gemaak
vilt oet de hemel op de welt
´n Bloum die ontwaakt
zo inéns dien prie raak
d´r is get nuujts wat telt
wat zich opéns bekèntj maak

Veer höbbe ummer waal get te wunsje
anger graas is ummer gruiner
laote gaer de tuikes viere
´t leifs in eige henj

Urges wurt óm de eer gevochte
Urges wurt nao mach gesjtraef
En ederein dae mitlaef
wet dat dao bloud aan vasklaef
dat ein laeve weenig telt
en gein sjien van kans haet

Veer wille ´n welt, zonger pottentaote
mit God in de vaan, me van God verlaote
Veer zuike sumpel en óngezawte
van alle luuj te hawte

Urges wurt d´r get gedeild
dao vluch ´n lechske euver de welt
Wie ´n pleister die ´n wónj heilt
en leifde die diene móndj sjtreelt
d´r is get nuujts wat telt
en noe ´n eige rol sjpeelt...

Me d´r blif ummer waal get te wunsje
Anger graas blif ummer gruiner
En mer zuike óngezawte
van alle luuj te hawte