Urges aan de Maas kinse prakkezere
gratis, vur niks , gedachte sortere
urges aan de Maas
ierlik waor
Vur mich ginnen dokter, pastoer of sychjater
Bej stress of gedoons - bin ich aan 't water
urges aan de Maas
mer ich zek neet waor

Want as idderein 't wet
dan kumt auch idderein
en dan wurt 't wiet te druk
en dan stopt de medicijn
As idderein 't wet
jammer mer helaas
dan wurt it wiet te vol
urges aan de Maas
urges aan de Maas

Urges aan de Maas kinse recuperere
dae bakstein in dien maag in alle rust vertere
urges aan de maas - zek ich ; god zij dank
Wurt 't mich te gortig en det wurt 't op tied
wuls ze mich spraeke en bes se mich kwiet
zeuk mer aan de Maas ; die is lekker lank

'T is wel 'n bietje vals
eigelik gemein
en toch zuusse det dukker
bej 'n waterdicht geheim
Nog vur gin 100 gulje
verraoj ich miene plek
nog neet vur 150
ich bin un bietje gek
ich bin 'n bietje gek -
'n bietje

De Maas begint in Lourdes - gluif ich -
in een grot
Maria kreeg compassie met de minse en hun lot
die heet det toen geregeld
die stapte nao de Baas en zei ;
de minse waere knettergek
gaef ze mer 'n Maas
gaef ze mer De Maas

En urges aan die Maas koom ich op verhaal
Det lukt neet aan de Rijn - vergaet 't aan de Waal
inkel aan de Maas
urges aan de Maas
P.S.
aafgeloupe wintjer - zoot ich 'n tiedje zonger
wil ich gaon meditere - dao stong mien plekske onger.