Mien moder die sjreef zich Van Horen,
Pa zag det ze van adel woor.
Maar Moe zag: geluif d'r mer niks van,
oze vader dae waas gewoeën boor.
Maar al waar häör familie dan neet van adel,
ze deje angers as die van Pa ziene kantj.
Die Van Horens maakte väöl meer moele,
mit die waar altied van alles aan de handj.

Want Van Horens die danse, Van Horens gaon nao 't café.
Van Horens höbbe det Franse Joie de vivre, sauve qui peut, hallikidé.

Die twee families kwome nooit same oppe kèrmis.
ze kwome altied ènne daag nao elkaar.
Van Horens Sjaak en Omen Antoon en Tante To Vlaai en Kóffie,
Jonge Klaore en 'n Sigaar.
't Gesjprek waerde al sjnel geanimeerd.
D'n eine zien jao waas veur d'n angere zo wie zo nae.
Ich heur ze noe nag sjtraevele:
Kan niks gaeve woe dae wónt, dao wónt dae.

Want Van Horens die danse, Van Horens die moele veur twee.
Van Horens höbbe det Franse Joie de vivre, sauve qui peut, hallikidé.

Alles haet zien veur, alles haet zien taege,
eder meneer van laeve ziene eige pries.
Van twee kenj kries se diene zaege.
As se mazzel höbs dan vinjs se dien eige wies.

En dao gaon die Van Horens op danse, Van Horens die gaon nao 't café.
Van Horens höbbe det Franse Joie de vivre, sauve qui peut.
Want van Horens die danse, Van Horens die moele veur twee.
Van Horens höbbe det Franse Joie de vivre, sauve qui peut
Joie de vivre, sauve qui peut, Joie de vivre, sauve qui peut: Hallikidé!