Sjeklien:
Waas vruger dan alles verkiërd Keto, waas vruger dan gaar niks good ?
De waereld is waal vuuel verliërd, Keto, waat vruger ôs zoot in 't blood.

Keto:
Al gaon ze veur ôs vuuels te wiëd Sjeklien, al duit 't ôs auk nog zo'n pien,
det is noow de geis van d'n tiëd Sjeklien, 't zal waal zoë môtte zien.

Wannier ik kinder praote huur, zô'n kinder van vandaag,
die miër of minder dinger doon, waat volgens mich neet maag.
As ik eur zegk: 'Schaamp geej ôch neet, 't is nogal waat nets',
dan huur ik weer: 'Maar tante Sjeklien, waat ziet geej alderwets'.

Wanniër ik nao de kerk toe gaon, dan heb ik gauw gezeen,
heej kriege allewiels de luuj gen zweel miër op de kneen.
Ik huur dao op mien echterste det ik sociaal môt zien,
wao ik nog minder van verstaon as vruger van Letien.

Wanniër ik merk wie moderne luuj alles anders wille doon,
dan zink mich smeis as neuchter mins de mood toch in de schoon.
Waat vruger krômp waas is noow rech, dan snap geej auk meschien,
waat die vandaag hebbe bewaerd, zal morge gelaoge zien.

Oet de Revu: 'Waat ennen tiëd'