Ich bön euveral ter waereld waal ens eine kiër gewaes,
in Londen, Marokko en Japan.
Maar nörges ter waereld is ein plaetske veur mich,
as Belvend, dao haaj ich now van.

As ich op kemiele in Egypte zit,
krank van sis kebab en koes koes,
sjleit ut in de kop en den kniep ich mich,
met ut ierste vleegtuug nao hoes.

Refrein:
Weej hebbe water, zon en zank wie in Rio,
Niagara watervalle beej de sjtuu,
bös en berg en oh sole mio,
wink en aaf en toe en raegenbuu. (2x)

Ich höb euveral ter waereld hiël vuul lol en plezeer,
in Brussel, Kölle of Brazil.
Maar nörges ter waereld bön ich toch zoë gaer,
as Belvend, wao ich blieve wil.

As ich op de berg sjtaon, wiet weg in Tirol,
misselik van de nudel'n, beer en sjnaps,
den jodel ich mich naor onger toe,
en dink det ich mich sjnel d'n trein maar pak.

Noejts mier nao Spanje toe. Schotland is veurbeej.
Noejts mier nao Timboektoe toe, ich blief leever heej.