toen veer Tarzan sjpeelde
in ‘t bos naeve de Sjteinwól
veel ‘t leeg in sjtökskes
door de buim

broene bielze ginge nao Pruuses
bleujende brem tösse de rils
op ós paerd door de praerie

gekke Sjeng dae waas bezaope
sjtook ‘t graasveldj in de fik
achter oze sjool
in diej gans nuuj wiek
pliese kwame, naome hem mit
maar noe gebeurt der dit

de R73 haet alles kwiet gemaak

toes nejde ich dertösse
toen Desiree ós leerde kösse
tösse de sjtruuk
biej die aaj pepierfebriek

Henk höbbe ze toen gegrepe
vasgebonje op eine sjtool
mit sjwaegel höbbe ze zien henj
verbrandj

vief daag vastelaovend
de waever óp ‘t plein
euveral zaate harmenieje
blouw bleumkes op dien kleid
in ‘t veldj tösse de aerpel
de zón die dreug ‘t sjweit

wiej veer hertjes in de sjtein kratste
biej EMS naeve de soos
zolle veer d’r noe nog sjteeds sjtaon
’t is lang sins ich bön weggegaon

tösse de gerages pielkes blaoze
sjeet ich det maedje in häör oug
dórs neet nao hoes te gaon

kiek mich aan ich haaj van dich
mit de tied in ós gezich
es ich dink wie veer toen ware
kiek mich aan en zing mit mich
de wäörd van dit gedich
doe en ich, die paar vrunj
in zaat Remunj

biej Herman drónke veer alt
In de Veldjstraot sjote ze emes kalt
sjtraote vol sjeldaote
kint emes ooit ‘t hate laote?

van ‘t Kelezje nao ‘t laeve
höbbe ze mich nog get mit gegaeve:
himmelhoch jauchzend und
zum tode betrübt

kiek mich aan ich haaj van dich
mit de tied in ós gezich
es ich dink wie veer toen ware
kiek mich aan en zing mit mich
de wäörd van dit gedich
doe en ich, die paar vrunj
in zaat Remunj